Investigadores da USC descobren o mecanismo mediante o cal algúns fármacos diminúen o peso corporal

En concreto, trátase da bromocriptina (aprobada para o tratamento da diabetes tipo 2 en EEUU) e a cabergolina (fármaco utilizado para o tratamento de prolactinomas). Ambos fármacos activan a vía de sinalización dun neurotransmisor moi coñecido, a dopamina. O estudo demostra con experimentos farmacolóxicos utilizando estes medicamentos e con ensaios xenéticos, que a activación dun receptor da dopamina nunhas neuronas moi concretas do cerebro é capaz de activar un mecanismo que finalmente activa a graxa parda. Esta graxa parda, ao contrario que a graxa branca, é a encargada de gastar calorías para xerar calor, e xa que logo, ao aumentar o gasto enerxético axúdase a diminuír o peso corporal. Ademais, todo isto ocorre sen que os fármacos cambien a inxecta de alimentos.

Os resultados do traballo realizado principalmente en ratos, foron tamén corroborados en pacientes tratados con cabergolina. Isto foi posible pola colaboración do grupo dos Doutores Gema Frühbeck e Javier Salvador, pertencentes á Clínica Universitaria de Navarra e tamén adscritos ao CIBERobn, quen observaron que pacientes tratados durante un ano con este fármaco mostraban un incremento do gasto enerxético e unha perda de peso.

O traballo, que acaba de ser publicado pola revista Nature Metabolism, foi coordinado polo prrofesor da USC Rubén Nogueiras e a doutora Luisa Seoane, do IDIS, directores de teses no seu momento de Cintia Folgueira, primeira asinante do artigo. Ademais colaboraron tamén profesores doutros grupos de investigación da propia Universidade, como José Luís Labandeira, Miguel López e Carlos Diéguez; os doutores Gema Frühbeck e Javier Salvador, da Clínica Universitaria de Navarra e investigadores de grupos de Lille e Montpellier (Francia), Xenebra (Suiza), Utrecht (Holanda) e Cambridge (UK).