A eclipse parcial de Sol deste xoves poderá seguirse dende as 10.49 horas

'Fóra desa zona, a eclipse será parcial e a Lúa ocultará tanto menos o Sol, canto máis nos afastemos de dita zona', explica José Ángel Docobo, director do Observatorio Astronómico Ramón María Aller da USC.

Concretamente, na Península Ibérica, a magnitude da eclipse —fracción máxima do diámetro solar ocultado— terá o meirande valor en Galicia (0,2), diminuíndo segundo se descenda cara ao sur. O fenómeno completo comezará ás 10.12 horas e rematará ás 15.11 horas. En Santiago de Compostela, poderá seguirse dende as 10.49 ata as 12.41 horas, e con mínimas diferenzas horarias no resto de Galicia.

As últimas eclipses parciais de Sol observadas en España producíronse en 2015 e 2017. Asemade, en 2005 púidose seguir completamente unha eclipse anelar. “Dentro de cinco anos haberá a posibilidade de ver unha eclipse total na Península e ano e medio despois, outra anelar”, avanza o profesor Docobo.

Para o seguimento das eclipses de Sol é preciso seguir rigorosas medidas de seguridade. “Non se pode mirar o Sol sen a protección adecuada e menos usando prismáticos ou telescopios”, apunta o profesor Docobo. Asemade, recoméndase o uso de gafas especiais para eclipses “ou como moito cristais de soldadura de máxima protección”, engade o director do Observatorio da USC para logo matizar que, aínda así, cómpre facelo durante escasos segundos.