O mellor equipo español de debate universitario está na UVigo

“Foi unha competición dura cos 16 mellores equipos de España, polo que non foi unha tarefa doada, pero fomos quen de ir medrando pouco a pouco e, de feito, na primeira ronda perdemos contra o equipo con que nos enfrontamos na final”, explica Tomás Aparicio, que se amosa especialmente satisfeito de acadar por vez primeira a vitoria na LEDU. E é que a UVigo conseguira quedar subcampioa no ano 2022, ademais do título de mellor orador en varias ocasións, logrando, finalmente, nas últimas horas no Teatro Kursaal de Melilla o título de campión da Liga.

Pola súa banda, a Universidad Carlos III, que acadou o título de subcampioa, tamén logrou o título de Mellor Orador para Óscar Rodríguez.

Apoio e confianza, claves para a vitoria

6000 euros e un trofeo, entregado polo presidente da cidade autónoma de Melilla, Juan José Imbroda, son os galardóns que acreditan o equipo de debate da UVigo como vencedor da LEDU. “Apoiarnos e confiar en todo momento uns nos outros”, asegura Tomás Aparicio son claves para acadar este título, no que o equipo vigués, onte sobre o escenario do Kursaal, recoñeceu o papel da preparadora do grupo, Laura Bacariza, que destacou no seu discurso o labor de todos e todas as compañeiras ata chegar aquí, así como “a brillantez de cada un deles” e o lonxe que poderán chegar na súa traxectoria profesional, se así o acordan.

Unha trintena de persoas integraron o xurado que finalmente proclamou á UVigo gañadora da LEDU, cuxo presidente, Albet Rivera, destacou o igualado dos resultados. “O xurado soubo valorar o mellor de cada un e estivo á altura incomparable dos dous equipos. Aínda así, so un podía recibir o título de campión e este foi o grupo da Universidade de Vigo”, dixo Rivera.

Na procura de máis membros

Acadado o título nacional de debate, as e o integrantes da Asociación Retórica regresaron a Vigo para reincorporarse hoxe ás clases nas diferentes titulacións que cursan: Tomás Aparicio e Iván Fernández ADE/Dereito; Inés Túñez Tradución e Interpretación; Jesús Gómez Filoloxía Aplicada; Laura Leirós e Juan Calderón, enxeñarías e Laura Bacariza, un mestrado en Telecomunicación.

“Os próximos retos son seguir traballando para que a asociación atraia membros e os máis novatos vaian tomando o relevo”, sinala Tomás Aparicio en relación cos próximos obxectivos do vixentes campións de España de debate universitario.