A taxa de desemprego descendeu en Galicia máis de cinco puntos desde 1998 e a de ocupación incrementouse en case seis

O presidente da Xunta, Manuel Fraga, subliñou a tendencia positiva que está a rexistrar a evolución do emprego en Galicia nos últimos anos. Segundo as cifras da Enquisa de Poboación Activa, desde 1998 –ano da transferencia da xestión das políticas activas de emprego ao Goberno autonómico-, a taxa de desemprego na Comunidade galega descendeu en máis de cinco puntos e a taxa de ocupación incrementouse case en seis, malia que a poboación activa medrou neste período en máis de 128.000 persoas.

“Esta tendencia continuou este último ano”, engadiu o titular do Goberno galego, xa que Galicia foi a cuarta Comunidade na que máis medrou o número de activos e o número de ocupados, aumentando nun 2,27 por cento (fronte ao 1,8 por cento do Estado) e un 3,38 por cento (no conxunto do Estado, só un 2,74%), respectivamente. Así mesmo, entre 1998 e 2004 incrementouse o número de afiliacións á Seguridade Social en máis de 160.000 persoas, das que máis de 26.700 corresponderon ao ano pasado.

O titular do Goberno autonómico facía estas afirmacións durante a inauguración de Galiemprego 2005, a V Feira da Formación e do Emprego de Galicia, que se está a celebrar no Pazo de Exposicións e Congresos de Santiago desde hoxe ata o vindeiro 30 de abril. No acto de inauguración tamén participaron, entre outros, a conselleira de Asuntos Sociais, Emprego e Relacións Laborais, Belén Prado; o conselleiro de Economía e Facenda; Xosé Antón Orza; e o presidente da Confederación de Empresarios de Galicia, Antonio Fontenla. A titular de Asuntos Sociais leu a Declaración Institucional con motivo da celebración do Día da Seguridade e Saúde no Traballo.

PRIORIDADES DO GOBERNO GALEGO

“A mellora do emprego e da calidade do mesmo é un dos obxectivos fundamentais da Xunta de Galicia e, neste eido, a prevención de riscos laborais, a estabilidade no posto de traballo, a igualdade de oportunidades e a formación permanente constitúen algunhas das nosas prioridades”, sinalou Manuel Fraga.

LIÑAS DE ACTUACIÓN

Por iso, a administración autonómica xa puxo en marcha diversas liñas de actuación, como o Programa Labora (encamiñado a proporcionar unha experiencia laboral dun ano, como mínimo, aos mozos menores de 30 anos que se incorporen ao mercado de traballo); a formación profesional ocupacional; a modernización do Servizo Público de Emprego; ou os programas de fomento da contratación estable e de fomento do autoemprego. Os tres obxectivos fundamentais que se perseguen son: a consecución do pleno emprego; aumentar a calidade e a produtividade do traballo; e incrementar a cohesión e a inclusión social.

Así mesmo, o presidente da Xunta lembrou a “forte aposta” do Executivo autonómico coa creación do Instituto Galego das Cualificacións, “pioneiro en todo o Estado”, que está resultando “esencial” na determinación das competencias que deben ter os traballadores e na programación e adecuación da formación necesaria para adquirir esas competencias.

Co fin de reforzar a aprendizaxe permanente, tamén se aprobou o Plan Galego de Formación Profesional que persegue, en palabras de Manuel Fraga, a integración dos tres subsistemas de formación profesional –inicial ou regrada, ocupacional e continua- coa convición de que a formación debe ser entendida como unha necesidade permanente ao longo de toda a vida.

“Por este motivo –engadiu o máximo mandatario autonómico- desde a Xunta de Galicia, e co consenso dos axentes sociais, estamos a reclamar do Goberno central a transferencia da formación profesional continua cara a Comunidade Autónoma, en cumprimento da sentenza do Tribunal Constitucional que así o estableceu”.

RESULTADOS POSITIVOS

Os esforzos levados a cabo pola Xunta de Galicia en materia de emprego xa deron resultados moi positivos. Proba disto é o crecente aumento rexistrado na ocupación feminina, a creación de máis de 1.400 postos de traballo para persoas con discapacidade, os máis de 8.000 traballadores que se beneficiaron das axudas ao emprego autónomo; ou os máis de 11.500 desempregados que participaron nos programas de cooperación, que lle facilitaron experiencia laboral, lle permitiron mellorar a súa formación e desenvolver accións de interese social.

As iniciativas promovidas polo Goberno galego tamén permitiron a contratación de máis de 12.000 desempregados a través dos incentivos á contratación estable e que máis de 30.000 persoas participasen en cursos de formación profesional ocupacional.

CAMIÑO A SEGUIR

“Temos a vontade de continuar con esta traxectoria”, indicou Manuel Fraga, quen tamén subliñou que as actuacións promovidas desde o Goberno que preside están enmarcadas nas directrices comunitarias en materia de emprego. Neste sentido, o titular do Goberno autonómico lembrou que as institucións europeas están a debater as directrices de emprego para o período 2005-2008, con tres prioridades fundamentais: atraer e reter máis persoas no emprego e promover a modernización dos sistemas de protección social; potenciar a adaptabilidade dos traballadores e das empresas á flexibilidade do mercado laboral; e incrementar o investimento en capital humano a través da mellora da educación e da formación.

GALIEMPREGO 2005

Por último, o máximo mandatario autonómico amosouse confiado en que Galiemprego 2005 sirva para coñecer as distintas iniciativas e experiencias doutras Comunidades Autónomas e doutros Estados; a poñer de manifesto a interrelación entre a área social e a laboral; a perspectiva do emprego desde as novas tecnoloxías; as experiencias e procesos de determinación das competencias; a importancia da economía social como fórmula de promoción do emprego; ou as distintas experiencias dos Servizos Públicos de Emprego nacionais ou internacionais.

“A consecución de máis empregos e de maior calidade é un dos principais desafíos aos que se enfronta esta Galicia de comezos do século e de milenio”, sinalou Fraga. Pero “teño a seguridade de que o noso esforzo conxunto a prol de máis e de mellores postos de traballo levaranos a acadar o pleno emprego para todos os galegos e galegas”, concluíu.

PALABRAS DO PRESIDENTE DA XUNTA NA INAUGURACIÓN DE GALIEMPREGO 2005, V FEIRA DA FORMACIÓN E DO EMPREGO DE GALICIA

- “Segundo as cifras da Enquisa de Poboación Activa, desde 1998 (ano de transferencia da xestión das políticas activas de emprego á Xunta de Galicia), a taxa de desemprego na nosa Comunidade Autónoma descendeu en máis de cinco puntos, e a taxa de ocupación incrementouse en case seis; e isto malia que a poboación activa medrou neste período en máis de 128.000 persoas”.

- “Galicia foi a cuarta Comunidade na que máis medrou o número de activos e o número de ocupados no 2004. Os primeiros aumentaron nun 2’27%, fronte a un incremento estatal de tan só un 1,8%. Polo que respecta aos ocupados, a situación é similar: mentres que en Galicia medraron un 3,38%, no conxunto do Estado fixérono en só un 2,74%”.

- “Así mesmo, entre 1998 e 2004 incrementouse o número de afiliacións á Seguridade Social en máis de 160.000 persoas, das que máis de 26.700 corresponden ao pasado ano”.

- “A mellora do emprego e da calidade do mesmo é un dos obxectivos fundamentais da Xunta de Galicia e, neste eido, a prevención de riscos laborais, a estabilidade no posto de traballo, a igualdade de oportunidades e a formación permanente constitúen algunhas das nosas máximas prioridades”.

- “A posta en marcha do Programa Labora; a formación profesional ocupacional; a modernización do Servizo Público de Emprego; os programas de fomento da contratación estable e de fomento do autoemprego, entre outros, son algunhas das actuacións postas en marcha pola Xunta de Galicia para lograr tres obxectivos principais, que se complementan mutuamente: a consecución do pleno emprego, aumentar a calidade e a produtividade do traballo e incrementar a cohesión e a inclusión social”.

- “Na actualidade, as institucións comunitarias están a debater as directrices de emprego para o período 2005-2008, nas que se distinguen tres prioridades fundamentais: atraer e reter máis persoas no emprego e promover a modernización dos sistemas de protección social; potenciar a adaptabilidade dos traballadores e das empresas á flexibilidade do mercado laboral; e incrementar o investimento en capital humano a través da mellora da educación e da formación”.

- “A posta en marcha do Sistema Nacional de Cualificacións e dos certificados de profesionalidade garantirá a competitividade dos traballadores galegos da esfera nacional e europea. A forte aposta do Executivo autonómico coa creación do Instituto Galego das Cualificacións, pioneiro en todo o Estado, está resultando esencial na determinación, xunto coas empresas, das competencias que deben ter os traballadores e na programación e adecuación da formación necesaria para adquirir esas competencias”.

- “Tamén co fin de reforzar a aprendizaxe permanente se aprobou, hai uns anos, o Plan Galego de Formación Profesional, co que se pretendía, así mesmo, a integración dos tres subsistemas de formación profesional –inicial ou regrada, ocupacional e continua-”.

- “Por este motivo, desde a Xunta, e co consenso dos axentes sociais, estamos a reclamar do Goberno central a transferencia da formación profesional continua cara a Comunidade Autónoma, en cumprimento da sentenza do Tribunal Constitucional que así o estableceu”.

- “Todos os esforzos levados a cabo polo Goberno galego, poden apreciarse no crecente aumento do emprego feminino; na creación, no último ano, de máis de 1.400 postos de traballo para persoas con discapacidade; nos máis de 8.000 traballadores que se beneficiaron das novas axudas ao emprego autónomo (...); nos máis de 11.500 desempregados que participaron nos programas de cooperación (...) Tamén coa contratación de máis de 12.000 desempregados a través dos incentivos á contratación estable; ou as máis de 30.000 persoas que participaron en cursos de formación profesional ocupacional”.

GALIEMPREGO 2005

Galiemprego 2005, a V Feira da Formación e do Emprego de Galicia, organizada pola Consellería de Asuntos Sociais, Emprego e Relacións Laborais, celebrarase desde hoxe e ata o vindeiro 30 de abril no Pazo de Congresos e Exposicións de Galicia. A feira ten como principal obxectivo dar a coñecer as accións que o Goberno galego e outras entidades están a desenvolver para a dinamizar o emprego. Nela participan todo tipo de entidades formativas, empresas, administracións públicas, axentes sociais, universidades e asociacións profesionais de Galicia e de España, converténdose en marco de referencia para o emprego en Galicia e en foro de intercambio de información entre todos os axentes que traballan no campo das políticas activas do emprego.

Galiemprego estructúrase en dous contextos complementarios: unha exposición onde as entidades participantes expoñen os seus produtos e información, e as xornadas técnicas onde prestixiosos profesionais do mundo empresarial e universitario comparten o seu coñecemento do mercado laboral cos profesionais e visitantes da feira.

As xornadas técnicas que se van desenvolver durante estes tres días versarán sobre O mercado laboral. Situación actual; Os servizos públicos de emprego de ámbito autonómico; Os servizos públicos de emprego de ámbito europeo; Formación profesional, ocupacional e continua: o novo modelo de formación profesional para o emprego; O mercado de traballo: competencias profesionais e a súa acreditación; Economía e Emprego; A tecnoloxía ao servizo do emprego: portais de emprego; e A empresa desde a Universidade: o acceso ao emprego dos titulados