Kalandraka edita, por primeira vez en galego, álbumes ilustrados de Eric Carle

Carle (Syracuse, Nova York, 1929) creou Unha eiruga moi larpeira en 1969. Malia o paso do tempo, esta obra conserva a súa frescura e vixencia. É un dos libros máis coñecidos do autor: traduciuse a 30 linguas e vendeuse a máis de 20 millóns de persoas. O ciclo vital dunha eiruga é o fío conductor da historia, dende que sae do ovo ata que se converte en bolboreta.

Seguindo o relato, os cativos fan un percorrido polos días da semana, os números e un amplo surtido de froitas e larpeiradas. O curso da natureza fai que a pequena eiruga experimente un considerable crecemento, momento no que tece o casulo onde se producirá a metamorfose. Nas páxinas centrais destaca o troquelado que representa os bocados que vai dando a eiruga.

A xoaniña rosmona data de 1977 e constitúe unha lección de boas maneiras. A mala educación da protagonista contrasta coa amabilidade doutra conxénere. As palabras “grazas” e “por favor” non forman parte do seu vocabulario. En cambio, o seu comportamento é unha procura constante de pelexa cos seres máis variopintos, sen importarlle o tamaño.

Destaca a maquetación, con páxinas de diferentes dimensións, máis grandes canto máis avanzan as horas do día. Porque A xoaniña rosmona é un producto global, no que tipografía, ilustración e relato van da man, tecendo unha estructura circular. Os lectores aprenderán a adquirir bos modais, medir o tempo e distinguir as formas, facendo unha viaxe pola natureza e os animais que a poboan por terra, mar e aire.

A natureza é un elemento de referencia constante na obra de Eric Carle, que tamén introduce conceptos de utilidade para que os nenos aprendan a manexarse no mundo que os rodea. A técnica do collage é outra das señas de identidade de Carle, que aplica unha técnica moi persoal, a base de papeis pintados á man.

Autor de máis de 70 álbumes, Eric Carle comezou a ilustrar libros en 1967, logo de moitos anos exercendo como director de arte nunha axencia publicitaria. Foi galardoado co Premio da Feira Internacional do Libro Infantil de Boloña (Italia), da Asociación de Libreiros Infantís e da Asociación Americana de Bibliotecas, entre outros.

Eric Carle ten dito: “Con moitos dos meus libros intento tender unha ponte entre o fogar e a escola. Para min o fogar representa afecto, seguridade. A escola é un lugar estraño e novo para o neno”.

Para o autor “o paso do fogar ao colexio é o segundo maior trauma da nenez”, despois do nacemento. “En ámbolos casos deixamos un lugar de calidez e protección por outro descoñecido”, explica Eric Carle, que confía na creatividade innata dos nenos: “Nos meus libros intento conter ese temor, reemplazalo cunha mensaxe positiva, e quero ensinarlles que aprender é realmente fascinante e divertido”, afirma Carle.