Teresa Nieto, Premio Nacional de Danza de 2004, abre a programación de Outono en Tui

Este venres estréase a programación cultural do Outono no Teatro Municipal Tui. Teresa Nieto en Compañía será a responsable do primeiro dos espectáculos que se poderán disfrutar en Tui ate finais de ano.



Teresa Nieto, Premio Nacional de Danza de 2004, presenta en Tui “Consuelo” un espectáculo no que explota, funde e reinventa a paixón dunha muller na súa madurez. No escenario canda ela van estar os bailaríns Jesús Caramés e Claudia Faci.



Teresa Nieto posúe unha longa e dilatada traxectoria que comeza no seu Tánxer natal onde compaxinou os seus estudos de danza española, danza clásica, solfexo e teatro. Prosegue a súa formación en Madrid a partir do ano 1979 con mestres coma Teresa Trujillo, Carl Pris, Christine Tanguay, Víctor Ullate ou Carmen Roche.



Dende entón a súa experiencia profesional repártese entre o seu traballo coma mestra, coreógrafa, e bailarina. Entre os anos 1986 e 1990 salienta a súa participación coma bailarina na Compañía Bocanada de María José Ribot e Blanca Calvo, e a súa colaboración con coreógracos coma Carl Paris, Margaret Jova, Denise Perdikidis e Iñaki Azpillaga.


Foi en 1990 cando Teresa Nieto presentou “Danza Breve”, o seu traballo como “Teresa Nieto en Compañía”. Peza a que lle seguiron “Dos veces breve”, “Calle del Cordón”, “Mano a Mano”, “Patio de Luces”, “Tórtola”, “La Mirada”, “El último café”, “A pedir de boca” , “Isla” e “Tánger”.


Ten desenvolvido unha inxente labor docente en centro coma o de Danza Víctor Ullate, na Compañía Flamenca de Antonio Canales e no Ballet Nacional de España baixo a dirección de Aída Gómez e Elvira Andrés. A todo elo se suman colaboracións coma a realizada co grupo Mecano coa coreografía e interpretación do video-clip de “Hijo de la Luna”.



No seu haber son numerosos os premios recibidos ao longo da súa carreira coma o Premio de Cultura da Comunidade de Madrid en 2002 ou Nacional de Danza en 2004.


Teresa Nieto chega agora aos escenarios, catro anos despois dos seus espectáculo “Tánger” e “Isla” con “Consuelo” unha renovada produción dramaticamente máis ambiciosa e madura. Poremos disfrutar desta nova aposta este venres ás 21.30h no Teatro Municipal de Tui. O prezo da entrada é de 6 euros, e as localidade poderán retirarse o propio venres a partir das 4 da tarde na billeteira da Área Panorámica.