O Porriño volcouse cos deportistas de Special Olympics Galicia nos Xogos Autonómicos de Baloncesto

As instalacións deportivas municipais de O Porriño acolleron o sábado a celebración dos décimos Xogos Autonómicos de Baloncesto Special Olympics Galicia, organizados na localidade pontevedresa por Special Olympcis Galicai coa colaboración da asociación local Accesca e de Fademga Feaps Galicia.

Deportistas con discapacidade intelectual dun total de 25 asociaicóns de toda Galicia competiron durante toda a xornada na competición por equipos, nas probas de destreza individual e nas probas adaptadas. A competición desenvolveuse con éxito grazas sobre todo á labor tan importante dos máis de 80 voluntarios que se achegaron a apoiar ás persoas con discapacidade intelectual. Neste Xogos Autonómicos de Baloncesto reuníronse preto de 500 persoas entre deportistas con discapacidade intelectual (343), adestradores (105) e voluntarios e integrantes da organización (70) e serviron de antesala aos Xogos Nacionais de Baloncesto que Special Olympics Galicia organizará no mes de novembro en Vigo coa participación da maioría das asociacións do resto de España.

A inauguración oficial dos Xogos correu a cargo do alcalde de O Porriño Raúl Francés Rodríguez; ao que acompañaron o Presidente de Special Olympics Galicia, Eladio Fernández Pérez; o Delegado Provincial da Vicepresidente da Igualdade e do Benestar, Francisco Javier Verea Argibay, a Presidenta de Accesca, María Luz Fernández Grandal; así como representantes da corporación municipal e da Xunta Directiva de Fademga Feaps Galicia.