A Vicepresidencia de Igualdade e do Benestar, a través da Dirección Xeral de Xuventude, organiza un xogo de rol en vivo no Castelo de Monterrei

Irmandiños: A Revolta é un xogo de rol en vivo, escrito e dirixido por 13 negativo, ambientado no século XV, durante a Segunda Revolta Irmandiña, revolución popular que tivo lugar en Galicia no ano 1467, na que milleiros de homes e mulleres de toda clase e condición se alzaron en armas contra os señores feudais debido aos múltiples abusos que contra a poboación se estaban a cometer.

O xogo comeza o venres 22 de setembro ás 12 da mañá e remata o domingo 24 de setembro sobre as 6 da tarde. Os xogadores
pasaredes a noite en tendas de campaña, para compartir todos e cada un dos momentos desta fascinante experiencia que se desenvolverá no castelo de Monterrei (ao lado de Verín) e nos seus arredores.

Poderán participar mozas e mozos de entre 18 e 30 anos. A cota de
participación é de 24 €, pero os posuidores do carné xove ou do carné máis teredes un desconto do 25 %. Esta cota inclúe a participación e as comidas durante todo o xogo, así como o desprazamento en autobús ata a zona de xogo.

A reserva de prazas poderédela realizar do día 1 de setembro ata o día 15 de setembro. Admitiranse ata un máximo de 500 xogadores.

Escolle xa o teu bando e prepárate para participar na máis espectacular batalla que endexamais se viu fora das pantallas de cine. Únete á loita de IRMANDIÑOS: A REVOLTA!