A Universidade da Coruña, campiona do IV Torneo Latinoamericano de Debate Universitario

O grupo campión estivo capitaneado por Óscar Juanatey sendo os oradores Santiago Brey e Horacio Emanuel Carretero. As Universidades de Santiago de Compostela e Zaragoza conseguiran chegar ás semifinais aínda que non puideron finalmente acadar a final para debater sobre a cuestión Axuda ao desenvolvemento ¿o peixe ou a cana?.
No torneo, celebrado nun ambiente moi distendido e participativo, acordouse ademais a creación dun comité internacional de debate universitario que liderará a Universidade de Santiago e que terá como cometido a unificación de criterios para a realización das posteriores edicións do torneo iberoamericano.
Nesta cuarta edición participaron equipos compostos por tres debatentes de quince universidades. Así, asistiron as Universidades Diego Portales (Chile), Americana de Managua (Nicaragua), Anáhuac de Xalapa (México), Lusiada de Porto (Portugal), Tecnológica Metropolitana de Chile, Cantabria, Valladolid, Zaragoza, Salamanca, Santiago de Compostela e A Coruña, así como o Equipo Arciniegas (Colombia), a Cátedra UNESCO-URL (Colombia e México), o Multiuniversitario Tajín de México e a agrupación de debate de Nicaragua. Como novidade, todos os debates, por primeira vez no mundo, foron dobrados á linguaxe de signos.
O xurado estivo composto polo equipo de xuíces que colabora habitualmente na Liga Nacional de Debate Universitario e que recibe formación específica anualmente mediante cursos impartidos por expertos en debate coa finalidade de unificar criterios e crear unhas bases de valoración.