O IES Ramón Menéndez Pidal-Zalaeta, da Coruña, gaña a I Liga Galega de Debate

O equipo do IES Ramón Menéndez Pidal-Zalaeta, da Coruña, converteuse no gañador da I Liga Galega de Debate, unha competición intelectual con formato deportivo organizada pola Dirección Xeral de Xuventude e Solidariedade. Como finalista quedou o equipo que representaba ao IES Becerreá, do concello lucense do mesmo nome.

O equipo campión foi galardonado cunha viaxe de fin de semana ao Parque Warner Bros en Madrid e un ordenador portátil para cada integrante do equipo. Ademais, outros 40 alumnos do seu mesmo centro terán tamén esa mesma viaxe. O outro equipo finalista desta competición obtivo unha videoconsola para cada integrante do equipo. A Dirección Xeral de Xuventude repartiu tamén agasallos para a mellor oradora da competición, que recaeu en Silvia Fernández Castro, do IES Rosalía de Castro de Santiago, que levou unha cámara fotográfica dixital de 8 megapíxeles; e para o segundo mellor orador, Jorge Pan Varea, do colexio Fogar de Santa Margarida da Coruña, que foi premiado cun reprodutor Mp4 de 4 Gb.

¿Debe primar a seguridade pública fronte á liberdade individual?. A partir deste tema arrincou a I Liga Galega de Debate, na que competiron un total de 23 centros educativos de toda Galiza. O obxectivo: fomentar entre os estudantes galegos os debates de competición, é dicir, enfrontamentos dialécticos nos que dous equipos se enfrontan defendendo a postura a favor ou en contra dun determinado tema.

Máis e mellor competición

O director xeral de Xuventude, Rubén Cela, foi o encargado de clausurar esta mañá, logo do acto de entrega de premios, a primera edición desta competición dialética. Na súa intervención Cela salientou a grande acollida que a iniciativa tivo entre os centros educativos e entre os estudantes, o que fixo que a convocatoria resultase todo un éxito. Ademais, Rubén Cela avanzou que o seu departamento traballará a reo para que esta competición teña continuidade no tempo e para acadar que a vindeira edición todo sexa “máis e mellor”. A posta en marcha de iniciativas deste tipo son, a xuízo do director xeral de Xuventude, unha oportunidade única para que os mozos poidan aprender unha actividade beneficiosa para a súa formación integral, ao tempo que teñen a ocasión de dar a coñecer as súas opinións e experiencias sobre a actualidade do país.

Certame único

A I Liga Galega de Debate é unha competición sen precedentes no país, unha actividade con formato deportivo e contido intelectual na que tomaron parte máis de 100 estudantes de todo o país, o que a convertiu tamén nun punto de encontro para mozos e mozas de toda Galiza. Trátase dunha actividade clave para a formación integral dos estudantes, na que poderán desenvolver capacidades útiles para a súa vida académica, profesional e persoal.

Na I Liga Galega de Debate, estudantes de 1º e 2º de Bacharelato das catro provincias galegas tiveron a oportunidade de facerse escoitar, demostrar o seu potencial e vivir unha experiencia única fóra das aulas. Dende Xuventude considérase esta iniciativa un complemento perfecto para a formación dos mozos e mozas á marxe dos seus plans de estudo, xa que os debates permiten o desenvolvemento de habilidades sociais e persoais como a expresión oral, o traballo en equipo, a busca de información, o saber falar en público, o respecto ou a tolerancia.

Cada equipo de debate estivo composto de catro debatentes e un capitán. Dos catro debatentes, dous actuarán como oradores e dous como investigadores, funcións que poderán variar dun debate a outro.

Toda a información sobre a I Liga de Debate está nas páxinas web www.ligadedebate.com e en www.xuventude.net.