O ciclo ‘Viraxes’ apoia a innovación musical con bandas populares que se atreven co circo, o teatro e a clásica

Os concertos foron galardoados na convocatoria dos premios Innova, promovida en 2019 pola Federación Galega de Bandas de Música Populares (FGBMP) e a Xunta de Galicia a través da Axencia Galega das Industrias Culturais (Agadic) para fomentar a experimentación e innovación no eido musical.

Carmina Burana en galego

O ciclo arranca no Xardín do Teatro do Gaiás o vindeiro sábado 21 de setembro coa popular Carmina Burana, a cantata escénica profana de Carl Orff que cativa a todo tipo de públicos coa súa espléndida percusión e riqueza rítmica que dá variedade ao conxunto e impide calquera monotonía.

A versión que se representará no Gaiás é unha tradución íntegra dos textos medievais ao galego, con música do século XX feita por músicos galegos e con máis de 150 artistas no escenario. Dirixido por Manuel Villar Touceda e interpretado pola Banda de Música Municipal de Valga e o coro Gli Appassionati e tres solistas (soprano, tenor e barítono), este Carmina Burana en galego exemplifica a busca de Orff dun formato que revele o poder elemental da música, permitindo ao oínte experimentala como unha forza primitiva e abrasadora.

O concerto terá lugar ás 18,00 horas e será de entrada libre e de balde ata completar a capacidade do auditorio ao aire libre do Xardín do Teatro da Cidade da Cultura.

Circo e teatro en decembro

Viraxes continuará xa en decembro con outros dous espectáculos, que nesta ocasión terán lugar no Museo Centro Gaiás. Por unha banda, a Unión de Guláns –unha das bandas máis antigas de Galicia cunha traxectoria que se remonta ao século XIX– interpretará o 7 de decembro o espectáculo MIB: Músicos in Black, xunto ao grupo de teatro Todos Xuntos. Trátase dun proxecto teatral nado da colaboración entre ambas formacións artísticas e coa implicación de toda a veciñanza desta pequena aldea de Ponteareas. MIB tráenos un relato sobre a importancia da música na vida cotiá, contándonos en clave de humor os hilarantes sucesos que acontecen tras unha aterraxe alieníxena nunha aldea galega.

O sábado 14 de decembro o circo protagonizará o último dos espectáculos de Viraxes co proxecto Orquestra de malabares, da Unión Musical de Meaño e a compañía galega de novo circo Pistacatro. O espectáculo está concibido para asistentes de todas as idades, aínda que se dirixe especialmente a un público infantil e familiar, que de seguro gozará desta abraiante danza aérea nun diálogo escénico entre seis malabaristas e unha banda de música.