Ir o contido principal
iniciar sesión

Novas

  • O paro na nosa comunidade reduciuse en cinco puntos entre as persoas mozas nos últimos anos
    A conselleira de Promoción do Emprego e Igualdade, Elena Rivo, compareceu hoxe no Pleno do Parlamento galego para dar conta das medidas da Xunta co gallo de mellorar a situación laboral e económica da mocidade en Galicia. Unhas medidas que, segundo aseverou, contribuíron a que a taxa de paro entre as persoas de 24 a 29 anos pasase de representar o 19,6% en 2018 a situarse no 14,3% no último trimestre deste ano. Na súa intervención, a conselleira referiuse á mocidade como un “colectivo prioritario en todas as políticas de emprego da Xunta, clave para garantir o futuro de Galicia”.
  • Galicia lidera en ciencias e equidade no informe PISA e mantense por riba da media de España e da OCDE en todas as variables
    O sistema educativo galego mantén unha boa situación en todas as variables analizadas polo Informe PISA, cun liderado claro en ciencias e en equidade, segundo os datos correspondentes a 2022 que acaban de coñecerse. O estudo reflicte un contexto xeneralizado de baixada nos resultados acadados, tanto a nivel estatal como internacional, consecuencia da afectación da pandemia no sistema educativo, tal e como conclúen os autores de PISA. Pese a esta realidade esperada, Galicia mantén o seu diferencial co respecto á media do conxunto das comunidades autonómas e do contexto internacional.
  • O encontro D10! celebra a súa oitava edición cun programa de exhibición, formación e debate arredor do circo
    Pistacatro, recente Premio da Cultura Galega en artes escénicas, organiza a oitava edición de D10! Encontro para a formación e innovación no circo, que se desenvolve en Santiago de Compostela ata o vindeiro 7 de decembro arredor dun programa que combina laboratorios de investigación e creación coa exhibición de espectáculos e coloquios. O Salón Teatro acollerá a primeira das seis propostas de artes circenses das que o público galego poderá gozar ata o domingo 3. O CDG acollerá tres propostas escénicas: Runa, do artista sirio-catalán Amer Kabbani; Rollercoaster, do malabarista estadounidense Wes Peden, e Nus, da catalá Cèlia Marcé.
  • O arcebispo de Santiago pregoará o Belén de Begonte, que foi presentado hoxe en Lugo
    O evento está declarado de interese turístico galego e o seu principal atractivo é o belén electrónico con figuras animadas, que pode visitarse ata finais de xaneiro no centro cultural José Domínguez Guizán. Do 23 de decembro ao 7 de xaneiro estará aberto todos os días, de 11 a 13 horas e de 16 a 19 horas. Durante as restantes semanas abrirá sábados, domingos e festivos pola tarde. Paralelamente, convócanse o XXXIV Certame galego de arte José Domínguez Guizán, e o Certame nacional de poesía sobre o Nadal, o Certame xornalístico Begonte e o Nadal, e o Certame de debuxo infantil sobre o Nadal, que alcanzan xa a súa cuadraxésimo oitava edición.
  • A mostra 'Viaxar para pintar. Sorolla en Galicia' anima a redescubrir a estreita relación do autor coa nosa comunidade
    A mostra inaugurada no Museo de Belas Artes da Coruña está comisariada por Sonia Martínez, conservadora do Museo Sorolla en Madrid e contén preto de 90 pezas entre as que se inclúen óleos, debuxos, acuarelas, téxtiles e incluso xoias elaboradas polo artista e inspiradas nas súas visitas a Galicia. Trátase dunha escolma que retrata “o paso do pintor pola nosa terra e tamén a relación que tivo con persoeiros da época como Concepción Arenal”. “Isto supón unha oportunidade non só para afondar na relación de Sorolla con Galicia, senón tamén para entender como se estaba a construír a Galicia urbana de comezos de século". Ademais, tamén estarán presentes algunhas das pezas máis salientables do autor como La Romería, na que se retrata os xardíns do pazo de Vista Alegre de Vilagarcía de Arousa ou Las lavanderas de Galicia.
  • A igrexa da USC acolle a exposición das fotografías, pinturas e esculturas finalistas do Xuventude Crea 2023
    O programa Xuventude Crea 2023 premia as mellores creacións en Fotografía e Artes Plásticas. Lucia Castro Álvarez, con 'Todos levamos sal nos ollos', fíxose co primeiro posto no certame de Fotografía; mentres que Abraham Alonso Méndez, coa súa pintura 'IA 1993', venceu na modalidade de Artes Plásticas. As outras creacións galardoadas polo xurado do Xuventude Crea foron en Fotografía as seguintes: 'Ellipsism' de Iria Álvarez Liñares resultou segunda clasificada e 'Persoas' de Alejandra del Carmen Vera Echegaray quedou en terceiro lugar. Tamén houbo dúas mención de honra para Naiara Ayelen Carrazza Ibáñez por 'Paisaxes da alma' e Rodrigo Cruz Gómez, pola súa obra 'Desarraigo'.
  • Preto de 400 alumnos participan nos obradoiros Dixitalweek para mellorar as súas competencias lingüísticas e tecnolóxicas en inglés
    Preto de 400 alumnos de 6º curso de Educación Primaria de 23 centros educativos de toda Galicia participan nos obradoiros Dixitalweek. Trátase dun encontro que complementa o programa de estadías de inmersión lingüística en inglés vinculadas á actividades dixitais do mesmo nome e no que este outono participan un total de 1.200 alumnos ata 4º curso de ESO. Nestes encontros, os alumnos realizan actividades de práctica idiomática en distintos escenarios comunicativos vinculados ás contornas tecnolóxica e científica.
  • A Filmoteca de Galicia dedícalle un ciclo a Jon Jost co gallo da estrea mundial do filme 'Casa do silencio'
    A Filmoteca de Galicia será en novembro o escenario da estrea mundial de Casa do silencio, produción de aCentral Folque, filmada en Galicia polo cineasta experimental Jon Jost. Con tal motivo, o director estadounidense será obxecto dunha retrospectiva dentro da carteleira de novembro da cinemateca da Xunta, que inicia tamén un ciclo sobre o realizador portugués Pedro Costa e incorpora o novo apartado As filmotecas presentan... ás súas seccións habituais.
  • As bibliotecas de Betanzos e Cenlle reciben o Premio á Innovación Bibliotecaria de Galicia 2023
    Nesta edición foron recoñecidos os proxectos da Biblioteca Municipal Alfonso Castelao de Betanzos por Boa práctica Club de lectura da historia de Betanzos (na categoría de entidades locais con máis de 10.000 habitantes) e a Biblioteca Municipal de Cenlle pola iniciativa Colaborando co cole: biblioteca para tod@s (entidade local cunha poboación de ata 10.000 habitantes). Coincidindo coa Xornada de Bibliotecas Públicas de Galicia, a Xunta entregou estes premios para poñer en valor o labor destas entidades a prol da cultura. Baixo o título Fondo local. Memoria e identidade,a xornada centrou a ollada na importancia dos fondos locais e na achega deste servizo a todas as localidades galegas.
  • Ovo, o novo espectáculo do Circo do Sol chega como atractivo e reclamo turístico do nadal galego
    OVO é a 25ª producción en directo do Circo do Sol, creada con motivo do seu 25 aniversario. Estreouse por primeira vez en Montreal no ano 2009 e visitou 30 cidades en seis países diferentes como espectáculo de Gran Carpa antes de transformarse nun espectáculo de pavillón no ano 2016. Poderá verse en varias sesións no Multiusos Fontes do Sar, en Santiago de Compostela. No espectáculo teñen especial protagonismo os insectos que traballan, comen, se desprazan, xogan e loitan. Cando un misterioso ovo aparece entre eles, os insectos senten unha intensa curiosidade por ese obxecto icónico que é, ademais, o fío conductor do espectáculo. Ademais das acrobacias e espectáculos, destaca o vestiario, inspirado nos superheroes futuristas e en armaduras de calquera época.